هەواڵەكان

شێخ خەمیس خەنجەر سەرۆكی حزبی سیادە باسی لە سەردانی سەرۆك مەسعود بارزانی كرد بۆ بارەگای سیادە لە بەغدا و ئاماژەی كرد بەگرنگیی زۆری سەردانەكە لە پتەوكردنی هاوكاریی نیوان لایەنە سیاسیەكاندا.

شێخ خەنجەر خۆشحاڵی خۆی بەسەردانەكەی سەرۆك بارزانی دەبڕی و وتی:"سەرۆك مەسعود بارزانی شەرەفمەندی كردین لە بارەگای سیادە لە بەغدای پایتەخت و بە ئامادەبوونی سەرجەم سەركردەكانی پێكهاتەی سوننە". ئاماژەی دا بەو ڕۆڵە گرنگەی كە دەیگێڕێت لە كۆكردنەوەی سەركردەی لایەنە سوننەكان "برامان بارزانی؛ ڕۆڵی گرنگی بینیوە لە كۆكردنەوەی سەركردەی لایەنە سوننەكان و كۆبوونەوەی بۆ یەكخستنی ڕا و هەمئاهەنگی هەڵوێستیەكان بەئاراستەی دۆزە چارەنووسساز و گرنگەكان".

شێخ خەنجەر جەختی كردەوە لە گرنگیی هاوكاریی نێوان هەموو لایەنەكان بۆ بەدیهێنانی ئایندەیەكی باشتر بۆ عێراق " پشتگیریی هەموو چارەسەر و پێشنیارەكان دەكەین لەچوارچێوەی دەستوور و سازانە سیاسیەكان بۆ بەردەوامیدان بە ئاسایش و سەقامگیریی لە وڵاتدا".